政情：熱門局長人選 個個封嘴
下屆政府組班工作將近完成，人選亦相繼曝光，但大部分熱門人選仲係好口密，唔肯透露半點風聲。尋日有兩個政策局嘅四位疑似局長人選分別出席兩項活動，當中唯獨疑似文化局局長、前灣仔區議會主席黃英琦（Ada）肯開金口，其他就一律封嘴唔評論加入新政府嘅傳聞。
本身係香港當代文化中心總監嘅Ada，尋日出席香港公平貿易雙周活動時，點都唔肯講自己會否做局長，但就話文化局絕對有必要成立，因為現時嘅文化政策散落喺唔同政策局，實際上難以配合；佢又話，文化局可以創造更多文化空間，培育呢方面嘅專才、做好資源分配同文化保育喎。
許曉暉急急腳走人
活動上仲有曾經被傳會做文化局局長嘅現任民政事務局副局長許曉暉，佢尋日笑容可掬，但唔知係咪趕時間，未散場就一支箭走咗。
另外，兩位教育局局長熱門人選包括科大副校長黃玉山及教育局常秘謝凌潔貞，尋日都應邀出席教育工作者聯會嘅活動，佢兩位都係絕口不提做局長問題。