宣傳片中嘅愛心護士就算面對病人諸多要求、呼呼喝喝都保持專業，仲話最開心係見到病人好番喎，試問病人又點捨得搵佢哋出氣吖！今次護協寧願掟錢請靚女Model，點解唔搵番公立醫院啲護士拍得真實啲呢？護協主席李國麟就話：「醫院大把護士靚過佢哋啦！如果去晒拍廣告，咁搵邊個睇住啲病人呀？」
李國麟嘆暴力個案增
李國麟話，早年已發現病人暴力對待護士嘅個案增加，甚至有護士曾經畀病人用鹽水吊架扑頭，雖然經反映後個案數字回落，但近排又再回升番：「最慘係有啲動口不動手，報警都無用，甚至有啲畀病人博懵都唔敢出聲！」佢希望市民睇完宣傳片後，體諒吓護士工作辛苦喎。