政情：林D9去向耐人尋味

自知「無得留低」嘅林D9，前晚同CY一齊見記者講解新政府架構重組時，雖然打咗一條黑底白點嘅送殯呔，但全程都表現大方，被問及去留問題亦對答得體，無好似煲呔曾咁黑面發爛渣再暗寸人，廣獲政界好評。有政界人士指出，想當年煲呔曾都一度失意官場，被貶為清潔香港大隊長，點知後來時來運到執死雞做咗特首，因此力勸現年僅五十六歲嘅林D9要「留得青山在」。

掌廉署地位夠超然

政界其中一個提議係由林D9掌管廉政公署，雖然廉政專員薪級只屬首長級第八級（D8），同林D9個名唔係好匹配，但呢個位勝在夠晒超然，直屬特首而毋須匯報任何政策局，加上嚟緊要處理「貪曾」及新地兩單大案，做得好可贏得唔少掌聲，從谷底大翻身。

另一個可以考慮嘅係平等機會委員會主席，盛傳現任主席林煥光將重返政府出任副政務司司長，林D9過往喺政制及內地事務局管開平機會，做呢個位絕對駕輕就熟。此外，有傳現任政制及內地事務局局長譚志源將轉職民政事務局，幫CY搞地方行政同社團聯誼工作，如果傳聞屬實的話，林D9大可重操故業，若最後成功落實雙普選，肯定會令中央及CY對佢另眼相看。

北上發展亦係出路

至於另一個更爆炸性嘅建議，就係出任行政會議召集人，呢個位地位崇高，喺禮賓府排名屬特區第三把交椅，僅次於特首同終審法院首席法官，仲高過立法會主席。加上林D9最擅長就係唱好港府政策，攣都可以拗番直，絕對適合出任行會召集人為新政府保駕護航。

如果林D9唔想做任何本地公職，選擇北上發展都係一條出路。林D9任內幫阿爺做咗咁多嘢，任勞任怨，不顧民望高低，盛傳中央已經留咗個全國政協委員甚至政協常委畀佢做安慰獎。至於由特區頒授嘅大紫荊勳章，林D9就更加走唔甩，只係爭在喺今年七一定係明年先至頒畀佢。總之只要林D9願意，起碼有半打職銜任佢揀，絕對唔使咁快就告老歸田。