中環出更：陳南祿「煲冬瓜」那些年笑爆京城
恒隆集團董事總經理陳南祿（Philip）喺商界身經百戰，但講起廿幾年前派駐北京，急急惡補普通話嘅瘀事，認真搞笑。佢話當時只聽得明三成普通話，於是搵咗北京老師惡補，日日照住官方喉舌報章嘅社評狂操「煲冬瓜」，三個月後終於可以同人溝通。不過，佢一開口就嚇親人，事關佢講嘅係社評式嘅中文，喺京城鬧出唔少笑話。
尋日下午Philip現身位於油塘嘅福建中學附屬學校，出席由青年事務委員會及香港青少年發展聯會合辦嘅名人座談會，同一班後生仔分享人生經驗。Philip喺香港大學畢業後就加入國泰航空，前後喺集團工作長達卅三年，直至兩年前被恒隆董事長陳啟宗延攬至麾下，總算事業順利。
大一暑假做船員
但Philip自爆，出世時爸爸已經六十歲，小時候屋企好窮，讀大學時佢都未試過搭飛機出埠。所以大一暑假嗰年，佢膽粗粗上咗一艘國際線嘅貨船做船員，當係人生第一次海外旅程。結果返抵香港早已開咗學一個月，激到學校紮紮跳。