中環出更：CY親民 一日趕三場
對兩屆政府交接工作一直毫不上心嘅煲呔曾，前日終於召開行政會議特別會議通過「三司兩副司十四局」新架構，候任特首梁振英（CY）隨即向傳媒做解說工作，另一方面「梁朝」新班子組班工作亦大致完成，CY疑似暫時放下心頭大石，尋日跳出候任辦連走幾場活動，同各界近距離接觸了解民情。
CY尋日行程緊湊，首站喺早上先到電台，為新政府架構重組做推銷工作，期間遇到示威者到場請願，佢二話不說就親自接過請願信，又同請願人士握手。
到花墟買有機泥
到下午又再出動到旺角，出席香港教育工作者聯會喬遷新會址嘅開幕儀式。卓妮見CY入場後極受歡迎，大家都爭相同佢握手合照。
正當大家以為CY出席活動後，會返回候任辦或回家休息之際，CY突然到旺角花墟買有機泥同種子。花店老闆話，CY經常到來買花，彼此相識十多年，另有老闆形容CY好親民，事事親力親為，所以支持佢出任特首。
花店負責人汪太則透露，曾向CY反映花墟泊車問題，唔知一向「急市民所急」嘅CY，上任後會否從速解決呢個問題呢？
卓妮