香港人愈來愈長壽，大家知唔知點解？其中一個原因係港府涼薄，好多老人家被迫鬥長命，因為命仔短啲隨時輪唔到安老宿位、等唔到骨灰龕位、攞唔到生果金，甚至享受唔到「兩元乘車」優惠添！
顧名思義，所謂「兩元乘車」優惠，即係長者及殘疾人士可以用兩蚊任搭車船咁解。大家係咪依稀有啲印象呢？冇錯，呢項措施其實早喺上年十月施政報告已經提出，點知港府拖拖拉拉，依家先至宣布下個月向立法會申請撥款，你話喇，老人家唔夠長命點等到吖？
優惠詳情係咁嘅，下月底率先喺港鐵推行，九月中四間巴士公司睇齊，明年初擴展到大嶼山巴士同渡輪。當局聲稱全港有一百一十萬人受惠，其中長者佔約九十八萬人，庫房每年開支四億元喎。
本來呢，遲到好過冇到，新措施係就係姍姍來遲，總算落實在望。問題係，措施落實之後，對長者同殘疾人士嘅支援係咪就足夠呢？答案當然唔係喇。
先唔講有關措施係分段實施，巴士同渡輪優惠仲要慢慢等，魔鬼在細節中，優惠措施並不包括小巴同電車，即係話，搭開小巴同電車嘅老人家根本無法受惠。可以點做？咪繼續鬥長命囉，希望等到港府有朝一日皇恩浩蕩，或者會將優惠範圍擴大嘅。
殘疾人士一樣唔係全部受惠，按當局建議，非百分百殘疾人士不在範圍之內。好似視障人士咁，同樣行動不便，但就被摒於門外，點解？咁就要問港府喇。
所以話啫，港府推出兩蚊搭車計劃，根本只係敷衍民意，唔係真心真意解決長者及殘疾人士需要。其實，喺內地城市，長者同殘疾人士早就可以免費乘搭公共交通工具喇，香港係富裕城市，港府窮到只剩下錢，居然連內地都不如，真係失禮死人。
即係咁，兩蚊搭車計劃姍姍來遲，涵蓋範圍更加天殘地缺，正正反映港府官僚涼薄。唔使講其他，就講安老同扶貧吖，樣樣有名無實，餐餐虎頭蛇尾，基層市民咪只能自生自滅囉。
一句講晒，港府胡混度日，施政敷衍塞責，皆因煲呔曾其身不正，終日掛住同班富豪聯群結黨圍威喂，退休之後住唔到深圳禮賓府，一樣可以住半山豪宅，點會關心基層市民嘅苦況吖。好彩夕陽政府就快玩完，家陣惟有寄望下屆政府撥亂反正，希望老人家唔使再苦苦地等！