候任特首梁振英（CY）出名係心急人，今次佢推動新政府架構重組，一方面要應付煲呔曾政府嘅暗裏阻撓同拖延，另一方面又面對立法會嘅出缺安排拉布戰，自然令佢急到跳舞。尋日佢就搶先煲呔曾一步，分別喺朝早同中午會見傳媒，狠批議員玩拉布導致流會，可能會阻礙佢嘅架構重組大計，令整個社會蹉跎歲月，同時亦改變唔到香港經濟社會發展停滯不前嘅局面。
