一直對文化藝術不聞不問嘅立法會議員霍震霆（Tim霍），當然難逃被狠批同揶揄嘅命運，「八十後」藝發局委員蔡芷筠直言難以容忍由Tim霍代表文化界；而文化人周俊輝更疑似發出最後通牒話︰「文化界嘅代表，霍生你喺邊度呀？」
網民對版權條例修訂反對聲音浩大，至今至少一千八百人聯署反對，尋日正式加入聯署行列嘅著名創作人潘源良批評，由商務及經濟發展局推動該條例立法工作可能係錯配，反指新政府會設立文化局，到時應參與商討。
有與會者更把反版權條例同九月立法會選舉拉上關係，強調無論Tim霍或馬逢國參選都好，都唔可以支持版權條例修訂喎，如果Tim霍想連任真係要打醒十二分精神喇！