政情：黃楚標呻「禮賓府」無人租
早前本報獨家踢爆煲呔曾接受富豪海陸空款待，包括以低於市價租住深圳東海花園一個六千三百呎嘅頂層複式單位，以打造深圳「禮賓府」作為退休居所，但最終喺各界狠批下高調放棄租住單位。不過，有關單位至今仍未租出，業主黃楚標就大呻租客難求，事關近期內地房地產無乜起色，又話自從無咗煲呔曾呢個大客仔後，雖然單位多咗唔少曝光率，但仍然無人問津。
黃楚標話，煲呔曾之前落咗成年訂金，依家雙方律師仲處理緊解除租約嘅細節問題，同埋計算煲呔曾「撻訂」到底要賠番幾多錢畀佢。外界一直覺得佢哋兩個關係密切，但黃楚標尋日就同煲呔曾劃清界線，話大家其實唔係太熟，一年淨係見面兩至三次。有傳煲呔曾會喺七一後搬入細妹曾璟璇喺西半山干德道康苑嘅一個低層單位，黃楚標話如果係真嘅都係一件好事，因為起碼唔使被人話佢哋兩兄妹有利益輸送喎！