政情：車船優惠貪曾圖邀功
夕陽政府收檔在即，但一早講明「六月三十日前我話事」嘅煲呔曾，就喺呢個政府「末期」大派甜頭籠絡人心，企圖爭取任內丁點兒政績。如果大家記得，煲呔曾年初喺立法會答問大會上話要爭取喺卸任前落實六十五歲以上長者及殘疾人士兩元乘車優惠，當時已隨即被人踢爆此舉礙於技術問題，根本好難預期落實，點知佢為咗個人名聲，迫令勞工及福利局局長張建宗（小肥張）將兩元乘車優惠斬件推出。
我哋之前講過，有知情人士聽到煲呔曾提出兩元乘車優惠計劃後，大鬧煲呔曾講嘢唔經大腦，又話佢下巴輕輕亂咁噏，因為計劃涉及好多複雜嘅技術問題，加上要向立法會財務委員會排期申請撥款，所以最快要到下半年先至可以落實計劃。其實小肥張喺一月底已講明，目標係上半年敲定計劃嘅具體安排同細節，下半年才能推出優惠，暗示根本無法喺煲呔曾卸任前落實推行。
隨時會出現混亂
不過，小肥張忽然喺尋日出嚟向公眾公布兩元乘車優惠計劃細節，大家聽到都感到相當驚訝，質疑點解可以咁快就落實計劃？聽真啲先至知道原來計劃唔係一次過推行，而係斬件上碟，即係港鐵會喺六月底首先參與計劃，而九月中就輪到大部分巴士路線參與。有人就擔心推行時會出現混亂，搞到啲老人家唔知幾時搭乜有優惠，分分鐘到時政府又被鬧爆點解唔諗清楚就推出計劃。
照計為官多年嘅小肥張向來做事穩陣，應該唔會急於一時推出計劃，加上傳聞佢有機會留任下屆政府，亦無必要急於邀功爭政績，所以說到底都係順應好大喜功嘅煲呔曾，急就章推出一部分計劃，以挽救煲呔曾跌落谷底嘅民望，以及為爭取任內嘅丁點兒政績。不過，轄下嘅公務員就因此而受罪，為盡早推行計劃日趕夜趕，仲要勞煩公共交通機構配合，煲呔曾臨執包袱前都要連累街坊，真係無好帶挈喇。