港鐵尋日舉行股東周年大會，卻遇上西鐵線美孚站發生電力故障贈興，令三個車站停止列車服務，加上資訊混亂及安排失當，玩殘大批上班嘅乘客，其中工聯會立法會議員王國興就因此趕唔切返立法會開會。不過，港鐵主席錢果豐竟然死撐話啲港鐵員工處理事故嘅表現唔錯，又話港鐵鐵路咁長，無可避免會出現事故喎。連主席都表現出咁嘅態度，難怪被市民鬧佢哋淨係識加價喇。
