前大律師公會主席袁國強盛傳將出任新政府嘅律政司司長，由於佢為人低調，公眾對佢認識不多。曾經同袁國強一齊參與交通諮詢委員會工作嘅律師會會長何君堯（Junius），尋日出席電台節目時就被主持人要求講吓袁國強嘅為人，點知Junius竟然叫人用社交網站facebook（fb），莫非佢想叫大家透過fb同袁國強做朋友，有助加深對袁嘅了解？
Junius呢個答案當然滿足唔到大家啦，經主持人再三追問下，佢終於講多幾句，話袁國強有新一代新青年代表性嘅一種性格，就係不斷求上進，每日做好啲，但永遠唔會做到最好，因為每日都喺學習當中，會經一事長一智喎。跟住佢仲大讚袁國強適應力好強，係年輕有為嘅先進，可建立好榜樣。
被稱為「法律界公職王」嘅資深大律師翟紹唐尋日亦話，佢同袁國強係二十年好朋友，相信袁可以捍衞香港核心價值，包括法治及一國兩制，如果袁真係做司長，佢會衷心祝賀喎。