「貪曾」曾蔭權貪盡海陸空，仲要臨卸任前到巴西豪華外訪，浪費納稅人血汗錢豪住總統套房。就係呢啲貪便宜醜行，令全城憤怒鬧爆，好彩佢最終知衰跪低，決定將原定本月中啟程嘅日本訪問，改派商務及經濟發展局局長蘇錦樑（Greg蘇）出訪。其實今次貪曾都算係鬼拍後尾枕，事關如果外訪可以由局長代勞，當初貪曾使乜咁堅持親自外訪呢？
特首辦發言人話，考慮到立法會有好多重要法案需要處理，包括替補機制、重組五司十四局等，認為煲呔曾有需要留守本港坐鎮，所以原定月中出發嘅日本外訪，雖然唔會取消，但會改由Greg蘇出席。不過，呢啲解釋都係廢話，事關呢啲工作一早就要做啦，點解之前又唔放棄去南半球多國外訪呢？
據講今次訪問日本為期三日，當中包括會出席貿發局喺當地搞嘅活動，亦都有機會到仙台探訪一班地震嘅災民。
睇完啲行程真係明白晒，貪曾之所以唔去外訪，除咗知衰外，以佢貪小便宜兼縮骨嘅性格，睇怕都係怕咗仙台啲輻射影響自己，換轉去其他地方外訪，佢肯定仆到去玩埋最後一次先至離任。