中環出更：楊敏德成功之道 皆因瘋狂
有「棉花公主」稱號嘅行政會議成員楊敏德（Marjorie），尋日同一班科技大學學生分享佢喺紡織界拚搏三十年嘅經驗。期間有同學問Marjorie事業咁成功有乜嘢關鍵，佢就笑言要有少少crazy（瘋狂）同different（與眾不同），而佢自己就係一個咁嘅人喎！
鼓勵學生保持創新精神
佢大爆自己讀書時期好頑皮，搞到教授要佢喺走廊罰企，但佢知道教授其實好錫佢，仲好支持佢呢種「壞」添。佢話，依家嘅學生成日困住自己喺個框框入面，害怕與人不同會招來批評，所以佢鼓勵大家要時刻保持創新精神，唔好怕犯錯，要從失敗中學習，更要學識寬恕自己。
同學對Marjorie嘅風趣演講好受落，即席向佢請教，有啲仲因為學業問題而當場喊咗出嚟，Marjorie即化身慈母安慰同學，仲叫佢哋唔好對自己要求過高，攞唔到A，攞B+都好足夠喇，最緊要活得燦爛，珍惜生命。