曾蔭權爵士被本報揭發貪盡海陸空醜聞後，仍趁出訪巴西期間以公費租住總統套房，外訪前港府駐外人員亦以「探路」為名，兩次公費到南美實地視察，估計整個南美逍遙遊，狂燒公帑逾百萬元。
老朽一早已批縮水治港嘅貪曾「外遊才是他的那杯茶」，又話佢一晌貪歡，最愛做離岸特首，全中！如果老朽貼馬都咁醒，睇怕亦可以用彩金豪住一晚總統套房矣！之不過咁，特首辦為貪曾解畫，又話「公事」需要，要喺房內舉行會議及接見當地官員，之但係翻查特首辦發放嘅相，總統套房內未見有當地政要人士喎！
上下交相講大話，香港明天所以見唔到艷陽天，民怨日增，深層次矛盾積到如一個大大個嘅壓力煲，完全都係貪曾一手造成！
貪曾曾經同啲青年人對話，好坦誠咁表白自己唔識歷史，又話讀書時最怕「讀史」，睇來係肺腑之言！講真，古代的模範君主真係唔易做，大家不妨上網睇吓周公所作嘅《無逸》，無逸，要言之，即係唔好貪圖享樂。喺周公筆下，中宗、高宗、祖甲、文王都係「無逸」嘅人辦，對底層民眾的生活有切身的理解和感受，不沉溺享樂，從善如流，有人提出批評，則更要嚴厲地反省、約束自己行為……總之，一個賢君真係「冇啖好食」！所以話，只愛豪遊嘅曾爵士，唔識歷史，唔讀歷史，也就貪得心安理得，貪到夕陽下山，心中依然氣魄更壯！