香港人生活緊張、食無定時，癌症愈來愈普遍。日前旅遊界立法會議員謝偉俊同「白姐姐」白韻琹出席公開活動，白姐姐就教大家要重視大小腸嘅護理，謹記食嘢七分飽，點解？事關人體嘅腸好長，食物落到大小腸需要一段時間，所以食到七分飽就啱啱好。如果經常食得太飽，好容易有宿便喺體內散發毒素，令致癌機會大增。
白姐姐愈講愈興起，仲傳授埋減肚腩妙方畀一眾城中貪靚嘅女士，秘訣就係戒飲凍嘢喇！因為當凍冰冰嘅飲品落到腸度時，腸壁會分泌含有脂肪成分嘅黏膜，長此下去，黏膜就會愈積愈厚，咪有成個肚腩仔囉！
此外，白姐姐仲勸大家唔好太執着，保持心情開朗、豁達，唔好成日鬱住鬱住，唔係就好容易有抑鬱症。
佢講到行雲流水咁順暢，但被問到會否出選立法會超級區議會，佢就窒吓窒吓，話仲未諗喎！