政情：譚凱邦轉戰新西 力保按金
○八年立法會選舉以一千六百票慘敗、被選舉事務處沒收五萬元選舉按金嘅環保觸覺主席譚凱邦，嚟緊九月將會捲土重來參選，但會由九龍西轉戰新界西。
繼續主打環保
譚凱邦話，今次係佢首次用環保觸覺名義參選，會繼續打正旗號宣揚環保，仲話今次目標係希望唔使被充公選舉按金，甚至爆大冷攞到一席喎。不過，就算唔使充公選舉按金，但距離贏到一席嘅票數仲差好遠。
譚凱邦話，政府近年大力發展新界西，令佢要諗計幫吓啲居民，所以先會轉區參選。今次參選除咗關注環保議題外，佢仲會將本土價值及國民教育等社會議題納入競選政綱。
佢又話，至今已經籌得約廿五萬元選舉經費，離四十萬目標金額只有一半距離。佢又話由於自己地區樁腳唔夠，會考慮同新民主同盟合作，以及積極搵新界西區議員支持。