政情：張震遠原來係半個山東人
大家一直都以為，候任特首梁振英（CY）參選期間，傾力助選嘅競選辦主席張震遠同CY都係山東人，但有傳媒報道話張震遠原來唔係山東人，係湖北人至真，究竟內裏有乜嘢玄機呢？
大方承認 唔係秘密
話說報道指張震遠爸爸張寒松祖籍湖北省，生前同國民黨關係密切，走難來港前已經有一名元配叫徐婌妃，來港後再娶祖籍山東嘅二房路蘊真，即係張震遠嘅媽媽，仲話路蘊真係台灣駐港機構、光華新聞文化中心前主任路平嘅堂姊。
尋日我哋搵張震遠求證，佢好大方咁承認，亦唔係乜嘢秘密，佢解釋因為爸爸嗰邊少親戚，佢同媽媽嗰邊嘅親朋戚友熟啲，佢亦較受媽媽影響，所以佢會視自己係山東人，況且佢從來無講過佢爸爸係山東人喎。
照咁睇，話張震遠係山東人都唔錯得晒，事關佢確實有一半山東人血統嘛！