我哋早前爆料，話教育局副局長陳維安寧願減人工都過檔立法會做秘書長，據聞原來佢唔單止撼低咗立法會助理秘書長林鄭寶玲，仲鍊低埋運輸及房屋局副局長邱誠武添！
對於陳維安過檔，唔少立法會中人都頗有微言，睇嚟佢過檔之後真係如履薄冰，除咗要應付班議員外，仲要擺平立法會內唔同人嘅意見，否則隨時有執包袱危機。
陳維安做咗副局長只係幾年貨仔，但個底已經花到七彩！人工過高、被爆係貪曾智囊、智經研究中心嘅研究小組召集人、太太無視人類豬流感肆虐校園期間嘅停課令、送囝囝讀國際學校，唔撐本土教育、處理教科書價格唔掂，就連問立法會申請大學三年撥款都觸礁，成績真係「有目共睹」。
據聞依家陳維安只差一啲例行手續就可以成為候任秘書長，綜合幾位立法會中人嘅睇法，都覺得呢次陳維安過檔肯定會窒礙秘書處內部嘅晉升機會，尤其係現年四十七歲嘅陳維安隨時一做多年，佢一日霸住個位，下面嘅人都好難有機會再上層樓，對現有職員唔公道。