政情：啟剛傳婚訊 唔做青聯主席

啟剛近年活躍於香港青聯及菁英會，每次搞活動，都站在最前線，雄心壯志不小，雖然按規矩下屆未輪到佢做主席，但接棒只係遲早嘅事，加上排喺佢之前嘅小莉同Ken朱有可能唔接棒，促使佢加速上位。不過，英雄難過美人關，據可靠消息話，啟剛紅鸞星動，打算喺今年十一月迎娶郭晶晶，據聞會由原來喺機場亞洲博覽館筵開四至五百圍，改為喺灣仔會展擺近二百圍。

傳朱鼎健望更上一層樓

大婚當前，試問啟剛又邊有時間諗競逐青聯主席吖，索性疊埋心水，先修身、齊家，明年再作考慮。又係嘅，啟剛係政壇新星，家底同背景夠晒厚，而且咁後生，打好根基上位，遲吓接埋爸爸霍震霆個立法會議席都唔出奇。至於點解有傳Ken朱唔接任主席位，有講法話佢除咗忙於打理生意外，仲同全國青聯換屆時間有關，傳佢望更上一層樓做全國青聯副主席。

咁講法，主席之位豈不是懸空？非也，據聞青聯高層已有後着，近排密斟葉振都冧莊多做一屆主席，呢個做法，其實早有先例，好似前主席陳仲尼、曾智雄及黃英豪等，都曾經冧莊做兩年主席。但係咪成事，就要睇葉振都嘅意思喇。不過，世事無絕對，吳小莉巾幗不讓鬚眉，最後決定接棒，亦未必無可能喎。

姑勿論邊個做都好，青聯稍後將召開遴選大會，由多位前主席建議合適人選，再由青聯兄弟姊妹以投票方式選出真命天子，邊個眾望所歸，相信好快就有分曉。