中環出更：蒙德揚露兩手炮製「醬煮鯖花魚」
作為電飯煲大王後人，信興集團副主席蒙德揚（David）除咗煮飯叻之外，原來煮餸一樣咁叻。話說以David嫲嫲命名嘅屯門中華基督教會蒙黃花沃紀念小學「信興創意科研工作室」，上星期舉行揭幕儀式，身為主人家嘅David就即場露兩手下廚示範「醬煮鯖花魚」，而學生們就以傳統「狗仔粉」招呼賓客，雙方廚藝各有水準。
David之前已多次參觀小學，知道啲同學煮得一手好菜，所以佢為咗味「醬煮鯖花魚」見得人，事前秘密練習，而當日亦帶備清酒、味醂、豉油，仲帶埋電飯煲同日本米到場，等大家食魚送飯，認真細心。至於一班小學生就出動令人回味嘅傳統「狗仔粉」回禮，即係用湯嚟煮嘅白麵條，再撈上菜脯及豬油渣等配料，食落香口又美味。
自爆雞蛋炒生米
其實David幾歲大就好鍾意下廚，最難忘係第一次炒飯唔知道啲飯要煲熟先至可以炒，結果變成雞蛋炒生米，食嗰時仲奇怪點解啲飯咁硬喎，笑到佢媽咪碌地咁滯。
卓妮同場仲見到全國人大代表曹宏威，講起下廚佢都有件趣事分享，話說當年佢喺外國讀書時同房係台灣人，佢哋兩個人一人負責煮一日飯，有日煮黃芽白炒肉片，因為掛住傾偈而落多咗鹽，最後要落糖中和啲鹹味喎！
卓妮