家陣做教師真係好惡啃，小朋友EQ低動不動就話跳樓都唔講嘞，淨係睇下教育局推出要教師硬食嘅課程，已經嚇到好多人之患心肝仔卜卜跳。好似通識教育，範圍闊過大西洋，即係叫人哋大話西遊啫。通識通識即係通通都要識，冇理由「如何處理爆屎渠」都要教一餐飽啩。
教育局玩完呢樣玩嗰樣，又話要推出德育及國民教育科。呢家嘢都講咗有一段時間嘞，最普遍嘅擔心就係，呢一科好容易變成「洗腦教育」，搞到學生哥一個二個淪為應聲蟲，一見到國旗就感動落淚，一見到領導就高呼萬歲。
受到輿論連番質疑，講得好聽係從善如流，講得難聽係腳軟跪低。教育局話喎，延遲三年先至喺小學同中學全面推行德育及國民教育科，呢三年設立開展期。發言人仲話，學校可以得到一次性現金津貼五十三萬元，可將津貼運用於聘請人手或者僱用服務，以及購置相關教學資源。
至於具體嘅課程內容又係點嘅呢？唔好意思，功夫茶唔知頭又唔知路，事關教育局嘅講法非常空泛，建議學生認識國家領導人咁話喎，講完都唔知佢講乜。德育及國民教育專責委員會主席李焯芬跟手耍咗一套太極拳，佢話課程對提升個人品德及國民質素十分重要，促進學生對社會對國家嘅身份認同。意思大概係話，返學讀書好重要，因為你會認同自己嘅身份係返學讀書嘅學生哥。
唉，其實計功夫茶話齋，今時今日嘅香港同國家，好鬼死難教德育㗎。你知啦，身教重於言教，你隨口噏當秘笈，叫人奉行仁義道德冇用㗎，你要身體力行做一個示範單位吖嘛。偏偏香港嘅高官一個二個係德育嘅反面教材，當今特首曾蔭權居然接受富豪款待構成「曾商勾結」，出訪巴西又要浪費公帑扮總統入住總統套房。曾經想做特首嘅唐英年更加同仁義道德大纜扯唔埋，一方面感情缺失，背妻偷食都夠膽死，一方面誠信缺失，地下掘個窿就變咗非法僭建二千呎行宮。喂，仲未計前政務司司長許仕仁，身為一個被廉署正式拘捕嘅疑似貪官，何德何能成為示範單位提供德育身教呀？
如果要認識國家領導人，功夫茶非常擔心學生哥愛錢多過愛國。睇睇嗰一個重慶前市委書記薄熙來吖，涉嫌黑錢億億聲轉移海外不特止，連人哋條命仔都因為金錢轇轕而冇埋。試問，點教？
所以話啫，如果滿街係聖人，德育根本唔使教，如果官場多貪腐，德育根本冇得教。咦咦咦，咪住先，教育局局長孫明揚都係一個知法犯法嘅僭建業主喎，德育又從何談起呀！