香港現行防止貪污的條例未能有效監管煲呔曾，公務員「廉潔奉公」的傳統對佢亦全冇約束力，是以貪曾懶理公眾嘩然、輿論壓力，繼續發揮佢貪到最後一分一秒嘅本色。
煲呔曾貪盡海陸空，食相難看。古時專為皇帝寫「起居注」的史官，對曾爵士的貪婪吃相，下筆恐怕也頗費周章。然而，碰上「在齊太史簡，在晉董狐筆」，在良史的筆下，貪曾的饞相自是無所遁形。
不過，以貪曾之剛愎自用、死不悔過的性格，必千方百計阻撓史官秉筆直書其貪婪之嘴臉。歷史上之暴君宋太宗，他便親自審定「時政記」、「起居注」，於是，關於「宋太宗謀害其兄宋太祖」的史實，在北宋的官方史料中便難以找到。不過，宋太宗萬萬想不到——遼國的史籍卻留下他謀害其兄的記載！
所以話，做咗衰嘢，唔好以為冇人監管到自己，便可以胡混過關，何況防民之口甚於防川。呢呢呢，好似上周六嘅長洲太平清醮會景巡遊，扮演貪曾嘅飄色小演員，便手持遊艇、飛機與豪宅模型，寸盡貪威識食嘅曾爵士！
貪曾嘅貪相深入民心民間，佢貪得無厭嘅「德行」同廉政連在一起，將來嘅公民德育課程，提起廉潔，講起ICAC，必定唔會忘記攞佢作材料，係一流嘅反面教材。貪曾之前話，佢卸任後要港人忘記他，睇怕佢小小嘅願望未能成真！懇請周一鑊獻唱《忘不了你》，執手相看淚眼齊齊下台！