喺特首選舉落敗嘅唐英年（唐唐）外遊散心返港後，終於喺尋日同候任特首梁振英（CY）見面。唐唐喺會面後被問到會否重返政府做官，佢就話自己仍然有心服務市民，但就會選擇過往未做過嘅渠道，又話如果做番以前做過嘅嘢，意義未必係最大喎。唐唐做官之前做過行政會議成員，又做過臨立會議員，如果上述幾個崗位佢都話做過唔再做，咁佢仲想做啲乜嘢呢？
