立法會早前辯論由教育界議員張文光提出嘅捍衞學術自由及院校自主動議，結果又係被班保皇黨議員否決，由於當日辯論撞正煲呔曾被爆「豪遊」南美醜聞，所以無乜傳媒報道。不過，有批學生哥仍然無忘記呢件事，發聲明譴責投票反對動議嘅多名議員校董，要求佢哋辭去所屬大學院校嘅校董職務。
學聯尋日發表聲明，點名批評六名身兼大學要職、但最後投咗反對票嘅議員，佢哋包括分別身兼港大、中大、科大及理大校董嘅民建聯成員葉國謙、陳克勤、李慧琼及陳鑑林，仲有身兼城大顧問委員會成員嘅專業會議何鍾泰及身兼理大顧問委員會成員嘅經濟動力林健鋒。
聲明又要求八名投咗棄權票及缺席投票嘅議員校董公開交代立場，包括自由黨張宇人、專業會議石禮謙、經濟動力劉皇發、工聯會潘佩璆、廠商會林大輝、會計界陳茂波、資訊科技界譚偉豪及民主黨涂謹申。學聯唔係點名，真係唔覺立法會有咁多大學高層呀！