政情：人民力量千方百計玩拉布
夕陽政府將替補機制惡法改頭換面後，明日就會攞上立法會大會恢復二讀辯論，人民力量議員黃毓民同陳偉業（大舊）為咗抗衡替補惡法，早前提出咗一千三百幾條修訂，意圖阻慢惡法通過。有人統計過兩人接力十五分鐘發言，理論上最少可講到二百多個小時，換言之最少開二十日會議，如果用盡發言時間嘅話，會議時間可能高達六百多個小時添！
如果要有效不間斷「拉布」發言，如何養好把聲係關鍵，所以毓民屆時會以國務院總理溫家寶說話腔調慢慢講，有人甚至教佢哋到時含住粒冰嚟發言添！不過，毓民本身都好大犧牲，事關佢原本計劃喺周五做眼部手術，為咗反惡法已經將個手術改咗期，仲未知幾時先有得再做。
大舊就話，佢會喺網上動員，邀請網民寫稿畀佢哋喺會上發言，又會鼓勵泛民主派議員到時發言，否則就避免出席喇，因此舉可以迫使多啲保守建制派要出席會議。究竟呢個議會抗爭會否寫入史冊，明日自有分曉。