政情：CY回請飯局問法律意見
特首選舉落幕後，「大和解」之風喺政商界吹起，廿多名建制派議員上月與候任特首梁振英（CY）喺中環中華總商會（中總）舉行「大和解」飯局後，據聞CY計劃喺本月十八日回請班建制派議員，飯局嘅地點巧合地再次喺中總舉行。
有知情人士話，一直對自己要求十分嚴謹嘅CY，對於呢個回請飯局都好上心，有人仲考慮到建制派議員本身係選委，認為要諮詢法律意見睇吓回請佢哋有無問題，為咗安全起見，議員要有心理準備隨時要回復「AA」制夾錢喇！
另外，CY尋日同中港家庭權益會代表會面，懷疑出現溝通誤會。話說工黨主席李卓人早上爆料話，民建聯主席譚耀宗（譚sir）有份出席呢次會面，質疑呢個做法係政治回報。候任辦發言人澄清話，原本都有諗過叫埋譚sir出席會面，但後來發現雙方已了解對方嘅睇法，所以毋須要譚sir出席今次會面喎。