候任特首梁振英司局長班子備受各界關注，適逢尋日工聯會舉行慶祝勞動節酒會，好多現任官員都有現身，但大部分都封嘴以免講多錯多。反而食物及衞生局局長周一嶽就反其道而行，問佢七一會做乜嘢時，佢竟然「玩嘢」話會放假，隨即惹來無限聯想。咁問佢放假放幾耐，佢就話「唔知」，其後疑似補鑊話當日係公眾假期，甚至話自己平時都係早上六點幾起身喎，認真無厘頭。
出席同一場合嘅仲有盛傳會接替俞宗怡出任公務員事務局局長嘅黃鴻超。本身係公務員事務局常秘嘅黃鴻超，被問到如果獲邀出任局長會否接受，佢直言「唔答」，又笑笑口話「唔好問，好快就知」，千祈唔好寫佢講嘅任何嘢喎。另外，政圈盛傳曾任特首辦主任嘅平機會主席林煥光有機會重返政府，甚至會出任副政務司司長。工聯會榮譽會長陳婉嫻就大讚林煥光過去嘅工作，直言係佢哋鍾意嘅官員喎！