政情：陳茂波入閣甚囂塵上
候任特首梁振英（CY）決心重組政府架構，由依家嘅三司十二局改組成三司兩副司十四局，連人選都已經搵得七七八八，當中外界就盛傳會計界立法會議員陳茂波（Paul）有機會加入政府。不過，如果阿Paul真係加入政府，佢個會計界議席就會騰空，據聞佢已經密密搵定接班人，人選係同樣「挺梁」嘅會計界選委林智遠，但相信將要面對業界對手嘅激烈競爭。
阿Paul喺特首選舉初期已經支持CY，好似立法會用特權法查CY時，阿Paul都有幫手，又拉攏立法會五散人支持CY，其中資訊科技界譚偉豪及醫學界梁家騮最後都係投票畀CY。加上佢同CY嘅理念相同，本身係執業會計師，以佢喺業界多年嘅專業經驗，相信可以為政府出一分力。
我哋曾經問過阿Paul係咪會出任局長，但佢就好口密，既無承認亦無否認，淨係話依家唔敢評論喎。如果阿Paul真係加入政府，立法會會計界議席就會騰空，相信會惹來界內人士一番龍爭虎鬥。
會計界席位 多人虎視眈眈
上次立法會選舉阿Paul嘅對手有會計師龔耀輝等，而嚟緊九月選舉有傳泛民主派嘅梁繼昌，以及特首選委「A16聯盟」嘅劉麥嘉軒都有意爭奪會計界議席，所以隨時出現三至四人大混戰，要當選唔係咁容易。
據聞阿Paul已搵到理想接班人，就係喺去年選委會選舉中，以三千幾票高票當選嘅林智遠，佢得票僅次於「票王」李家祥，所以佢接替阿Paul出選立法會會計界嘅話，相信有一定票源，加上泛民喺界別一向得四成票，而劉麥嘉軒喺特首選舉中又押錯注支持唐唐，所以林智遠都好大機會可以力壓對手。
究竟阿Paul係咪加入政府，定係競逐連任立法會都係未知之數。不過，佢四年來嘅立法會工作表現都算不俗，對佢有問號嘅人相信已經比四年前少咗，唔知佢會否捨易取難挑戰新崗位呢？