中環出更：愛靚Tina Green打造百水晶屋
英國女富豪Lady Tina Green，近年熱爆潮界，佢挾時尚名牌TOPSHOP老闆娘之名，替友人以水晶豪裝超級遊艇，無心插柳，竟然獲法國國寶級水晶品牌LALIQUE睇中，開創一條家居系列路線，喺中環開設亞洲首間家居陳設專門店，任佢打骰。Tina日前旋風式訪港，教港人豪裝百萬水晶屋，更讓卓妮先睹為快。
旅居香港嘅Tina，對港人品味瞭如指掌，如果想將佢精心設計嘅飯廳搬返屋企，要花費逾二百萬元。咁貴係有原因嘅，Tina出名要求高，木材嚴選用以製作帆船嘅非洲木；每粒水晶都係由法國工匠打磨製造；木工、噴漆就非意大利工匠不用。難以想像，Tina這位設計奇才，原來無受過學院正統訓練，創作靈感不絕，全因天生貪靚。
家具有「出世紙」夠矜貴
LALIQUE亞洲常務董事李少傑（Thomas）話，家具矜貴之處，在於每件均附有「出世紙」及工匠簽名。部分傢俬更係限量版，全球只得廿多件，香港亦只獲配二、三件，矜貴如藝術品。以一個需訂造半年嘅黑檀木酒櫃為例，造價逾三十萬元；一張水晶餐枱，亦要逾四十萬元。
卓妮好奇，搵Tina設計，收費會唔會好貴？Thomas答得玄之又玄話：「Tina好有個性，鍾意嘅項目先會接。」Thomas仲爆料話，名人客戶有獨特要求，曾有客人要求訂造一個水晶洗面盆，LALIQUE工匠按要求做出一個「實驗品」，可惜因擔心面盆受不住冷熱水交替刺激，易令水晶爆裂，所以最後放棄製造喎。
卓妮