同人唔同命，同遮唔同柄，大家都係做官，待遇就不一樣喇。一個終日游手好閒吃喝玩樂，翹埋雙手等收工，一個就五勞七傷仲要抱病死頂，想話提早退伍都唔得，咁嘅荒誕百官圖，恐怕全世界只係香港獨有咯！
嗱，大家咁聰明，一定估到功夫茶講緊邊個啦，冇錯，就係「離岸特首」煲呔曾同教育局局長孫明揚嘞。講起煲呔曾，疏乎咯，日日傍住富豪黐飲黐食不特止，收工在即仲要盡地一貪，公幹為名，遊埠為實，呢度住吓總統套房，嗰度坐吓「空軍一號」，當正自己係「中環民國大總統」，歎盡呢份工！
相比之下，孫公就淒涼嘞，周遊列國冇份，周遊病房就有。數數手指，上年初患上腎衰竭、上年底感染退伍軍人症、早前跌斷右手入院留醫、跟住又接受小腸氣手術……最新病歷係甲狀腺有瘤，日前入院接受切除手術。
有名你叫，孫公係「外公級」官員，年老體弱，家陣更加五勞七傷，正常情況早就應該提早退伍，安心養病啦。不過，特衰政府就係咁唔正常，孫公尋日出院，仲話健康冇問題，會完成餘下任期，咁唔係「捱義氣」喎。
一個古稀之年嘅老人家，入廠密過入貨，開刀多過開飯，話健康冇問題，講都冇人信啦。局長擔子千斤重，孫公長期受到病痛煎熬，加上三日唔埋就入院，咁都仲要頂硬上，諗落都心噏。唉，冇計喇，港府人才凋零，孫公惟有焗住上囉！
古時老將帶病上陣殺敵，就話忠烈勇猛啫，今日香港高官帶病上陣，只係表示港府無能、高官無才咋。以一個百病纏身嘅官員苦撐任期，對孫公嘅健康固然有害，對市民更加唔好，絕對係一個雙輸局面。所以話啫，孫公抱病上陣，欲退不能，既係孫公嘅悲哀，更加係港府嘅恥辱！
話時話，孫公固然五勞七傷，而港府更加病到無得救。望聞問切，最易睇得出嘅病徵，就係高官新陳代謝系統閉塞。局長抱恙，本來理所當然由副局長頂上，可惜教育局副局長陳維安四年政績交白卷，主理教科書減價更加搞到一鑊泡，根本難接重任。由此證明，煲呔曾聘請副局、政助「培養人才」，根本係嘥米飯。
至於港府最嚴重嘅病症，就係患上「高官集體退伍軍人症」嘞。上至煲呔曾，下至司局長，全部翹埋雙手等收工，一係唔做嘢，一係猛遊埠。所以話，依家唔係同人唔同命，而係「同官唔同病」，孫公係身體有病，煲呔曾係思想有病，成個港府管治千瘡百孔，病入膏肓，唔使等七月一號，依家已經收得工㗎嘞！