政情：劉秀成寸貪曾住貴房
搞咗四、五年，油麻地戲院終於改建成為粵劇表演場地，立法會民政事務委員會四位議員尋日親自到場「驗貨」。將來除戲班可以喺油麻地戲院表演外，非牟利團體仲可以一千五百元租場四個鐘，專業會議議員劉秀成聽到即時大讚抵用，仲乘機寸爆煲呔曾外訪亂花公帑入住總統套房。
話說康文署署長馮程淑儀介紹到油麻地戲院場地租金時，劉秀成一聽到就忍唔住口「吟吟尋尋」話：「曾特首（住）一晚都……」，雖然佢無再講落去，但大家心知肚明，擺明寸緊外訪要住五萬四千元一晚總統套房、去惠州要坐「空軍一號」旅遊巴嘅貪曾。
一場來到，大家都緬懷戲院嘅昔日境況，原來劉秀成都喺度睇過戲，惹來睇三級片疑雲。不過，佢睇戲已經係五十年代嘅事，當時播放嘅係正經戲，佢話細個住喺油麻地，所以會去戲院睇戲，佢仲話好掛住當年嘅街邊小食喎！