政情：小伏無懼綁匪襲校園
日前喺司徒拔道名校發生嘅疑似綁架未遂案，令到城中名人父母莫不膽戰心驚。前財政司司長梁錦松太太伏明霞就話唔怕，事關其子女就讀嘅學校可以畀司機開車到校園內接送返放學，佢已吩咐工人姐姐及司機着緊啲，再加上自己盡量親力親為接送子女，難怪佢話唔緊張喇！
小伏尋日以小母牛愛心大使身份，出席國際小母牛香港分會活動。佢話，去年首次帶大女司渝跟隨小母牛去貴州探訪，囡囡親眼見到當地人生活困苦，又認識一對同自己年紀相若嘅小兄弟，但人哋已經要為家人煮飯，返學又要行一大段泥路。
返港之後，司渝主動話明年仲想再去，長大後都想做義工，幫助窮人，所以今年小母牛打算去雲南、四川一帶探訪，小伏會再同老公帶埋司渝一齊去。至於今年讀小一嘅囝囝，就要等佢讀三、四年級，懂事先至可以隨行喇。