政情：林健鋒扮唐唐似肥亨
立法會議員記者同樂日尋日舉行，掀起全晚高潮嘅係幾位議員同記者合力上演最熱門嘅「揼手選舉論壇」。會計界議員陳茂波扮演「Dream bear」（劉夢熊）維妙維肖，大家都爭相同佢合照，相反「唐營」核心嘅經濟動力林健鋒（Jeffrey），雖然係扮「糖糖」，但就一啲都唔似特首選舉落選人唐英年，反而似前高官馬時亨多啲喎。
議員模仿特首選舉人物
記者同議員喺同樂日上不忘諷刺時弊，合力表演「揼手選舉論壇」。平時鍾意扮嘢嘅陳淑莊就歪嘴扮葉劉淑儀主持論壇，而李華明就黐粒癦扮「鐵頭仁」（何俊仁）、Jeffrey扮「糖糖」、陳茂波就扮Dream bear，而兩名記者就飾演「思歪」同「私生子」，再由台下記者同議員發問，好似唐唐嘅感情缺失，以至連盛女問題點解決都有人問，全場爆笑。
除咗精彩話劇外，議員同記者都有一齊玩遊戲，好似鬥快聽加工聲帶估議員發言嘅「猜呈尋」、同埋「有口難言」、「收買佬」等，不過全部都係記者隊大獲全勝。