中環出更：李妮露背 艷壓博愛就職禮
博愛醫院董事局日前舉行就職禮，交遊廣闊嘅新主席潘德明一呼百應，眾老友齊齊入局拍住做善事，令到今屆董事局成員達到四十人嘅爆燈上限，人數係各大慈善團體之冠。就職晚宴上，副主席李妮（Lily）出動秘密武器，着上親自設計嘅性感露背綠色絲質晚裝，苗條身形表露無遺，艷壓全場。
今屆董事局成員好多新面孔，包括潘德明妹妹潘美蘭及囝囝潘治忠兩位新總理，仲有獅子會嘅「獅兄獅弟」，好多係八十後嘅年輕人。
潘德明鼓勵囝囝行善
潘德明話，阿仔啱啱讀完書出嚟做嘢，佢認為做善事有助於擴闊視野，做一年善事更勝讀一年大學，所以鼓勵阿仔入博愛喎。
前總理趙瑤嘅老公林辰峰（Sam）都係新總理，原來趙瑤已經有喜兩個幾月，年底將會添多名龍B，難怪阿Sam代妻出征，恭喜晒！升呢做副主席嘅衍生行老細彭少衍，獲太太Carmen撐場，佢哋為善最樂，難怪生意愈做愈順。
講起Lily件性感禮服，原來已經有十年歷史，Lily話好鍾意件衫，所以決定年年着一次，一來提醒自己身形唔好走樣，二來支持環保。佢笑稱，件禮服係佢尺度最開放嘅衫，不過好彩老公無詐型喎！
卓妮