有趣有趣真係好鬼死有趣，一個曾蔭權周遊列國做咗離岸特首，一個曾俊華又離鄉別井做咗離岸司長，一個邱騰華亦係遠走他方做咗離岸局長。功夫茶真係想問一問各位離岸高官，唔通特區政府發明咗一套無人駕駛技術？定係話，呢幾個高官根本係可有可無？
先講講曾蔭權嘅漫遊路線圖吖，呢一個坐慣富豪遊艇同私人飛機嘅貪曾，早前以訪問為名去咗新西蘭、智利同巴西。出訪巴西首都巴西利亞期間，煲呔曾貫徹貪威識食嘅個人風格，入住酒店一間總統套房，一晚房租連稅大約六千九百美元，折合港幣五萬四千元。呢一晚嘅租金，相信足夠劏房住客交租年幾兩年。
作為「曾兄弟」嘅曾俊華都有一鋪外遊癮，以財政司司長嘅身份出訪東南亞三國，包括越南河內、馬來西亞吉隆坡以及泰國曼谷。表面上當然係同當地政商巨頭會面尋找財路啦，實際上有冇「課外活動」就冇人知嘞。
最搞笑嘅係環境局局長邱騰華，率領綠色科技訪問團前往歐洲，訪問瑞典、丹麥、蘇格蘭同英國多個城市。搞笑嘅地方就係，邱局長嗰個一百五十億元焚化爐大計剛剛先至被扑低，立法會議員一嘢否決咗，局長大人家陣再去歐洲交流所謂經驗，參觀人哋轉廢為能嘅焚化設施，仲有乜嘢意義呢？
如果政府各大舵主平時外訪公幹，功夫茶唔會有乜嘢特殊意見，之但係咁，目前已經到咗新舊政府交接嘅倒數階段，一個二個高官密集式離開崗位好似烏蠅咁飛來飛去，到底為乜呀？嗱，你哋唔好話認真工作至最後一分一秒呀，三歲細路哥都唔會信啦！
計功夫茶話齋，已經進入彌留狀態嘅特區政府根本無心戀戰，咁先至會出現離岸高官愛漫遊嘅畸形現象，浪費納稅人嘅公帑支付外訪所需。就以邱騰華為例，明知自己就快夠鐘收工，明知焚化爐大計撞板收場，仍然拉大隊去歐洲咁多個地方交流轉廢為能嘅經驗，傻嘅都睇得出醉翁之意不在酒，在乎山水之間也。
講到轉廢為能，如果有一部機器，焚化廢柴高官之後可以轉化為能量，咁又唔錯呀。不過好可惜，咁神奇嘅機器應該只存在於叮噹漫畫，現實世界惟有眼白白睇住大量公帑供養一眾官場窩囊廢。
講真吖，邱騰華若然真係有心搞環保，咁就唔應該搭飛機呢度去嗰度去，一來避免浪費公帑，二來避免靠害地球。喂，飛機排放嘅廢氣好得人驚o架，少搭飛機先至係環保之道。至於有名你叫「氣候逃犯」嘅曾蔭權，好心唔好成日周遊列國啦，罪孽仲嫌唔夠深重咩，該煨！