立法會日前否決撥款一百五十億元在石鼓洲興建垃圾焚化爐，環境局局長邱騰華隨即「跪低」撤回計劃。
不過，佢事後接受傳媒訪問時依然死撐話，除非有神仙棒變走垃圾，否則下屆政府興建焚化爐都事在必行，尋日仲率領訪問團去歐洲，行程之一係到訪童話之父安徒生嘅故鄉丹麥睇焚化爐，莫非想搵支神仙棒救自己？但睇怕今次神仙都難救。
今次邱騰華會帶三名官員外訪八日，期間訪問瑞典、丹麥、蘇格蘭及英國多個城市，預計又係枉花一大筆公帑。今次邱騰華外訪話就話要發掘環保經濟合作機遇，但觀乎煲呔曾早前「暢遊」南半球多國，仲爆出期間入住幾萬元嘅總統套房添，市民一早已經唔再相信呢啲「搵商機」為名，玩樂為實嘅藉口，況且邱騰華喺○九年底已去過丹麥哥本哈根出席氣候峰會，點解當時唔順道考察垃圾焚化設施呢？
臨任期尾外訪嘅官員，仲有盛傳無得留低嘅商務及經濟發展局局長蘇錦樑，佢原定尋日出訪北京，可惜因為當地天氣差導致航班嚴重延誤，結果要取消行程，如今上京無期，唔知以後仲有無機會喇。