啱啱搬去旺角新會址嘅香港教育工作者聯會（教聯會），將於下月五日舉行揭幕禮，為隆重其事，教聯會除邀請候任特首梁振英（CY）出席外，更邀請咗下屆教育局局長嘅三個熱門人選，包括現任教育局常秘謝凌潔貞、香港教育學院校長張炳良及科技大學校長黃玉山，難得佢哋聚首見到CY，好似見工咁款。至於教聯會亦唔執輸，諗住到時趁機向CY推薦人選。
教聯會主席黃均瑜話，教育局局長最重要嘅條件係要有能力、有心，擁有教育專業，凡推出任何政策前必先做足諮詢工作。至於有傳CY有意將下屆政府嘅政治助理人工「一開三」，被教聯會力薦做政治助理嘅教聯會副主席鄧飛，就嫌人工低，即係要佢減一半人工，所以堅持唔會考慮喎。
如果要喺三個熱門人選中挑選，教聯會就似乎傾向教育專業出身的張炳良同黃玉山。至於被教育界虎視眈眈嘅立法會教育界議席，教聯會就坦言會積極考慮派人參選喎。