政情：林健鋒最叻原地踏步
當年政改方案一役，人人都話寧願原地踏步，都唔想行差踏錯，但到咗今時今日，原地踏步原來都係一條好路。好似經濟動力召集人林健鋒（Jeffrey），尋日出席中電一個活動時同總裁藍凌志大鬥法，喺中電自行研發嘅「踏步發電機」上鬥發電得多，估唔到Jeffrey竟然贏成條街，成功贏得「發電之王」稱號，亦稱得上係「原地踏步王」。
中電呢部自行研發嘅踏步發電機，只要個人企喺上面不停踏步，就可以發電。Jeffrey同藍凌志兩人於是即時比併吓，兩人行咗四十秒已經分出勝負，藍凌志只係發到0.5瓦時電，但Jeffrey就犀利喇，發到0.9瓦時電，即係多出差唔多一倍。根據中電提供嘅資料，只要喺發電機上踏步三十至四十秒，就可產生相等於手機通話一小時嘅電力。
中電話呢部發電機可以用喺健身中心，以收環保之效，不過，如果放喺立法會仲有效益，事關咁多議員支持「原地踏步」，分分鐘唔使交電費！