政情：政協常委空缺多 唐唐榜上有名

每逢人大政協換屆，喺僧多粥少下都為建制派內部掀起一場激烈爭奪戰，有政圈中人指，候任特首梁振英如無意外會辭去政協常委，專心做好特首工作，同時正被廉署調查嘅前政務司司長許仕仁，因為醜聞纏身亦預料好大機會自行求去，連同早年離世嘅徐展堂，形成今次至少有三名政協常委退下來嘅局面。

餘下兩空缺爭崩頭

據聞其中一個政協常委空缺已經「名花有主」，呢個就係曾喺政府服務咗九年嘅唐唐。有親中人士指，雖然唐唐喺選舉期間曾失控拋出「深水炸彈」，但喺中央正吹「大和解」之風下，唐唐好大機會獲得政協常委呢個「安慰獎」，當然唐唐會否接受又係另一回事，否則會騰出畀其他有心人補上。

至於另外兩個政協常委空缺，估計最少有五人有意爭奪，包括恒基地產主席「四叔」李兆基嘅長子李家傑、「福建幫」林樹哲、廣東社團總會主席王國強、中華總商會會長蔡冠深及「牛仔褲大王」楊釗。

有親中人士分析，五人之中以李家傑嘅商界背景較濃，而且對於內地發展嘅支持不遺餘力，至於另外四人都係親中社團嘅主要領導，中央對佢哋嘅信任程度毋庸置疑，但最後誰人成功出線相信有一番暗中較勁。

捐款有貢獻較着數

話時話，中央挑選政協常委嘅思路，始終係關乎有關人選過去對內地有否「有形」或「無形」嘅貢獻，例如捐錢捐得多嘅自然評定為「有貢獻」，機會自然大好多，相對於一啲財力唔夠、一直默默耕耘嘅親中人士只能望門興嘆，呢個世界就係咁現實o架喇！