中環出更：CY飯局惹組班疑雲
中環香港會所係城中忙人嘅飯堂，午膳時間總有名人出沒，但唔知點解尋日特別熱鬧墟冚，事關全國政協副主席董建華、候任特首梁振英（CY）、財經事務及庫務局局長陳家強、商務及經濟發展局常秘黃灝玄、滙豐銀行亞太區行政總裁王冬勝等人相繼出現。雖然無人承認係同CY食飯，但咁多敏感人物同時出現，難免令人猜疑是否又係「大和解」飯局或是組班疑雲。
尋日中午約十二點二十分，CY乘坐專車到香港會所用膳，轉頭董建華到場，兩人前後腳出現，現場亦見到做過立法會議員嘅中銀高層吳亮星；十五分鐘後，被傳入閣嘅王冬勝亦嚟到，霎時間令現場變得好唔平靜。CY逗留約一小時後微笑步出，無回答任何問題就登上座駕離去。
敏感人物相繼現身
近二時許，更多敏感人物陸續行出香港會所門口，其中陳家強同黃灝玄為避記者，前後腳由側門離開，兩人表現得好閃縮。卓妮問佢哋係咪同CY、董建華食飯，一個淨係識講「唔該」，一個淨係識笑。至於董建華就喺二時二十分由側門離開，佢一樣無答任何問題，只係同卓妮講聲Bye Bye，無再好似以前咁問人食咗飯未。
尋日現身香港會所嘅仲有挺梁嘅立法會議員陳茂波、前中大校長劉遵義、自由黨榮譽主席田北俊、啱啱卸任嘅前港交所主席夏佳理等，但個個都話唔係見CY喎！好似上周末，董建華就同唐英年、任志剛同時出沒灣仔君悅酒店，如果話無約埋嘅話，咁就相當巧合喇。
卓妮