生人霸死地究竟點解？功夫茶本來真係唔知，不過經歷過曾蔭權七年無聊而治，家陣徹徹底底明白點解。呢嗱，睇睇蒲台島，島上原本風光明媚，奇岩異石名聞遐邇，素有「香港南極」美譽，目前嘅狀況就變咗非法僭建千墓島，害到島民大吉利是啋啋連聲！
要知道蒲台島因乜事幹慘遭生人霸佔，變咗一塊亂葬死人之地，當然要從特區政府嘅殮葬政策講起。所謂殮葬政策，老實講即係你死你賤政策，因為公眾骨灰龕位嘅供應量遠遠低於市場需求，一個人百年歸老兩腳一伸，輪候骨灰龕位嘅時間隨時長過輪候公屋上樓。喺咁嘅情況之下，發死人財就化作無限商機，私營但無牌嘅骨灰龕場應運而生。你知啦，見利忘義符合人類與生俱來嘅自私基因，否則敗選特首唐英年以及一眾新界鄉紳都唔會忘記公義瘋狂僭建啦，所以蒲台島生人霸死地成為有利可圖嘅一盤生意。
兩個月前，本報率先報道蒲台島多個山頭嘅樹林被夷為平地，取而代之嘅係鋪設過千塊三呎乘三呎石屎板，狀似墓地以及擺放骸骨金塔嘅墓園。事件揭發之初，政府係威係勢㗎，曾經擺出一副高姿態，話會採取跟進行動喎，城市規劃委員會仲將蒲台島納入法定規劃管制範圍添。點不知雷聲大雨點小，本報記者兩個月以來多次重返島上了解最新情況，發覺工程只係改為有限度進行，案發現場更加移種墓園常見嘅松樹苗。換言之，政府即使有跟進，效果都係唔湯唔水。
有一件事仲好離奇古怪，天后誕當晚，島上村民發現一批為數二十幾人嘅外來者，有男有女有細路，神情呆滯臉帶憂傷，神神秘秘做咗一場撒花撒溪錢嘅法事，懷疑有人暗中為先人主持殮葬儀式。如果蒲台島唔係有人經營非法墓地，又點會有非島民做出咁靈異嘅行為呢？
講到呢度，係時候講講生人霸死地嘅另一種意思。當一個唔適合嘅人坐上唔適合嘅位，同樣係生人霸死地嘅表現。照咁講，曾蔭權係咪生人霸死地呢？當然係啦，坐上特首寶座七年以來，乜鬼問題都解決唔到，村屋僭建問題啦，雙非孕婦問題啦，劏房火警問題啦，貧富懸殊問題啦。好衰唔衰距離夠鐘落台只係剩番兩個幾月，離岸特首更加係採取龜縮策略，將所有計時炸彈留畀下屆政府引爆。
簡單咁講，蒲台島搞到變咗亂葬崗，源於曾氏七年亂政綱。唯一慶幸嘅係，七月一日換屆之期即將來臨，一肚氣嘅香港人終於可以大叫一聲，唔該伙記，同佢埋單！