夕陽政府一早hea住等收工，明明撐船不用篙——放任自流，香港深層次矛盾一大堆，雙非孕婦分娩配額、前高官貪腐問題、村屋僭建……貪曾就一於懶理，一味外遊逍遙，美其名「推動自由貿易，希望有助經濟增長」喎！阿哥，臨收工搞經貿，在位七年又唔見你咁積極？
煲呔曾自己「臥」足七年，其管治班子，大部分學足佢一味吹水，十足船頭上載太陽——度（渡）日而已！最突出嘅例子自然係雙非孕婦問題，煲呔曾、周一鑊除了玩太極推手，根本完全束手無策，困擾香港社會多年，引起醫療、未來社會規劃一大堆問題，總之搞到天怒人怨，如今CY一句「明年雙非孕婦零配額」，一向孭鑊當食生菜嘅周一鑊即跪低，而貪曾跌落地都要揦拃沙，話「六月三十日前佢話事」，到如今仍不肯承認自己係跛腳鴨！
人貴自知，貪曾至呢刻都唔覺得自己已是風乾臘鴨，人未走茶已涼！周一鑊就更加不知所謂，唯一成就就係搞到港人嘅生老病死，全部危機重重，港人唔使買飛睇驚慄片，淨睇周一鑊日日自編自導自演嘅「鑊鑊新鮮鑊鑊甘」已嚇餐死！
講開貪曾眾問責高官之無能就一把火，好似邱騰華推動環保一事無成，好似蘇錦樑之淫審諮詢，拖完三年又三年，一味放生壹淫媒，香港今日之所以烏煙瘴氣，全因呢班庸官當道！管治班子咁多瘀血，CY不去之，香港明天不會好！