特首選舉早就告一段落，一眾候選人、參選人、同埋唔知係唔係選過嘅人根據法例都要交選舉開支申報畀選舉事務處。尋日就有兩位「參選人」交咗開支，分別係新民黨主席葉劉淑儀，同埋有「巴士阿叔」稱號的陳乙東。陳乙東申報開支係零蚊，而葉太亦只係用咗約十萬蚊，連續被報道咁多日抵晒。
先睇葉太份申報啦，成個「選舉工程」一共用咗十萬零八百六十三元四角，最大部分係「代理人及選舉助理之費用」，一共要七萬七千八百蚊，支取呢筆開支嘅人全部都係新民黨成員同職員，葉太是否參選，份糧係唔係都要出。
另一條大數係租金、辦公室開支及運輸費用，一共用咗一萬三千幾蚊，其實都係新民黨會址嘅租金，都係已出之物，所以實際付出認真唔多。葉太特首選舉期間先後兩次棄選，見報見足幾個月，今次用咁少錢有咁好宣傳效果，認真抵到爛！至於陳乙東因為申報零蚊，所以冇乜好寫，不過聽講佢放過條片上YouTube喎，點解唔使錢呢？