政情：龐愛蘭「嫁」公民力量
一直盛傳會用沙田地區組織「公民力量」牌頭出選九月立法會新界東直選嘅沙田區議員龐愛蘭（Scarlett） ，日前終於成功「嫁入」公民力量，佢尋日承認正極之積極參選，被問到係唔係喺公民力量爭奪戰中贏咗廠商會立法會議員林大輝時，Scarlett強調乜都唔知，話只會做好自己事喎。
Scarlett一向主打專業同中產形象，佢尋日強調過其實過去多年佢都做過好多基層、年輕人同婦女事宜，總之就係全方位都有做喇。佢承認近日正接觸唔同團體同社區組織，希望爭取支持，其中另一個主要目標係新界東嘅獨立區議員，只要有一日佢覺得有足夠支持，到時就一定會參選咁話。新界東今屆選情混亂，聞說Scarlett照抄咗九龍西梁美芬模式，得到中聯辦支持，到底Scarlett可唔可以達成心願，咁就真係要拭目以待喇！