政情：議事廳怪談搞到休會
尋日立法會進行馬拉松式續會辯論，議員個個都疲態盡現，主席曾鈺成甚至聽到怪聲，唔通佢幻聽？話說立法會當時討論緊會唔會引用權力及特權法調查候任特首梁振英疑似披露行會機密，曾鈺成原本諗住畀商務及經濟發展局局長蘇錦樑發言總結辯論，但佢突然間停止發言。正當大家奇怪緊點解曾主席靜晒唔出聲時，佢面黑黑咁叫秘書處職員檢查怪聲來源，之後仲索性宣布休會。
立法會秘書長吳文華（Pauline）即時同一眾職員逐間房尋找怪聲來源，經過一輪查找之後，發現原來怪聲係因為三個清潔人員喺會議廳內不斷傾偈。
其實自從立法會新大樓開放畀市民參觀後，竟然不時仲嘈過街市，有參加導賞團嘅團體仲拉晒橫額影大合照，遊覽時又不斷喧嘩，如果曾主席見到呢個情況，相信應該唔只黑面咁簡單囉。其實公德心係公民教育嘅基礎，自己掛住嘈唔理人咁冇公德心，參觀立法會都冇用喇。