中環出更：善舉傳國際 政商賀黃林碧瑢
首創將新鮮剩餘食物送畀貧困人士嘅膳心連基金（Foodlink）日前舉行酒會，城中政商名人及酒店食肆代表雲集，氣氛好熱鬧。創辦人黃林碧瑢開心到不得了，事關佢十年來默默耕耘，初期備受質疑，至今終於做出一番成績，連英國前首相貝理雅太太同新加坡都邀請佢將善舉複製到當地添！
膳心連令貧家溫飽
黃太話，膳心連已獲四十一間城中知名酒店及食肆提供剩餘食物，每個月將逾八千公斤剩餘嘅食物，運送到貧困嘅家庭及團體手中，提供逾八千八百餐膳食，令更多人得到溫飽。
黃太又話好感謝挺身支持佢嘅奶奶，即係陽明山莊創辦人黃週旋嘅太太，令佢可以由陽明山莊會所餐廳開始做起，按部就班實現理想。
當日到賀賓客將現場逼到水洩不通，黃太三個寶貝女兒蕊蘋、巧芸及采笛亦有出席幫手張羅，佢哋都係基金嘅執行董事。台北經濟文化辦事處處長朱曦、港澳台灣慈善基金會骨幹等一眾台灣幫拉大隊嚟撐場。
朱曦話，膳心連嘅善舉結合咗環保同埋慈善，夠晒迎合潮流。黃太嘅好姐妹、新鴻基地產非執董郭炳湘太太郭李天穎係基金嘅主席，不過當日佢出咗埠，因此未有現身到賀。
東華三院副主席何超蕸百忙之中亦趕來撐場，基金副主席劉懿玲好開心話，希望更多機構加入團隊，齊齊以微笑送走飢餓。
卓妮