「跛腳」曾蔭權返港記招對答實錄

曾：政府餘下任期，主要係保持交接順利過渡，盡量支持下屆政府工作。六月三十日前政策同政策落實，我負責，如果係七月一日後期負責落實，當然係下屆政府負責，如果有任何政策跨越兩個政府時，大家商定。

第二問：周一嶽同私家醫院傾緊，但梁振英又有建議，係咪當周一嶽無到？

曾：梁振英同我都有共同目標，一定係順利過渡，所有政策唔影響市民服務，我諗周局長同佢傾呢個問題，都係循呢個目標做事。

第三問：政府現時同唔再同私家醫院傾，周一嶽做呢個決定前，有無通知你？

曾：（開始收起笑容及雙手放在胸前，表現出不耐煩）大家知道，關於呢個非本地孕婦產子（問題），我哋唔係現時開始傾，周局長同私家醫院傾咗兩年幾，不嬲都傾㗎啦。你所講係出年配額，當然由下屆政府參與同認同。

第四問：兩個政府講嘅嘢有唔同，代唔代表交接有問題？

曾：我哋兩個交接一啲都無問題！我哋有定期性見面溝通，對於有政策係跨越七月一號時，一定要具體商談。下一屆政府係關於下屆配額，梁先生想七月一號之後宣布，我覺得呢個無問題。

第五問：CY之前有無同你傾過停收雙非?

曾：（先長嘆一聲，表現極不耐煩）呢個係香港人普遍關注嘅問題啦，我相信佢做所有決定，都係聽周局長資料，聽到市民意見做決定，梁先生自己解釋自己決定係點樣啦。

第六問：政府現時政策係咪都要同梁先生傾過先推出？

曾：（頭部微微向下，似有難言之隱）實情交接係全面性，爭議性大嘅具體政策唔係好多，例如雙非問題，香港人關注，我又關注，梁先生又關注，大家傾好一個安排，係市民所公認，反映出交接係成功。

第七問：其實七月一日離任前，你仲有咩作用？

曾：（開始黑面，語氣逐漸加強）我七月一號前，所有行政工作、政策制訂，都係由我哋負責，我哋決定，呢個一定係嘅！

第八問：但現時係咪「跛腳鴨」政府呢？

曾：（本來已轉身離去，但聽到「跛腳鴨」一詞後立即轉身補答）我再講清清楚楚，所有嘢都係以我決定，當然七月一號嘅嘢一定係梁先生決定，我哋希望你哋理解呢個安排先。唔係話依家「跛」或後面「跛」，點樣「跛」，根本香港政府就唔會「跛」！我哋最希望能夠係，市民服務一定唔受任何影響。

第九問：到今年下半年，（內地孕婦）衝關（產子）好嚴重？

曾：後續問題，行政上結果，相信大家要克服，但最重要係過渡安排。

第十問：曾生你會唔會覺得好慘，作為特首咩都要CY話事？

曾：（第二次轉身想離開，但聽到問題後再次回身，再長嘆一聲及深呼吸後回答）我再講多一次，六月三十號前，所有嘢都係由我話事！七月一號之後就由梁先生話，呢個係事實嚟。

第十一問：公民黨向你提不信任動議，你有咩回應？

曾：我用謙虛態度聆聽各位意見，所有香港市民講嘅嘢我都要知，每個立法會議員所講嘅嘢，對我嚟講都係一個鞭策，我一定會虛心聆聽。（一邊手指記者，一邊發晦氣地說）問多啲，問晒佢、問晒先！

第十二問：係咪多咗一個權力核心？

曾：（完全黑面兼嘴藐藐地答）永遠係一個核心，七月一號之前，行政機關核心，就係呢屆政府，負責人係我，七月一號之後，負責係下屆政府，個核心首腦係梁先生，好清楚無重疊。

第十三問：事實上你雖然係核心，但制訂嘅政策畀梁振英推翻喎？

曾：（疑似發火反問記者）我哋邊一樣政策畀人推翻？

第十四問：你哋與私家醫院商討咗兩年，但突然「跪低」。

曾：我哋所講現時所講，係舊年配額、今年配額。出年配額，一定要得到梁振英先生同意啦，係咪？……仲有咩問添，問啦問啦！

第十五問：梁生嘅五司十四局好似到現時都沒任何進展？係咪可以喺七月一日之前做到呢？

曾：大原則係優先處理、保持今次交接安排順利，所有服務一定唔可以影響市民，如果有任何編制上更改，或架構上更改，一定同梁先生傾得清清楚楚。（轉身離開）