房署工程龜速 居民鬧爆
柴灣漁灣邨漁順樓地下大堂出入口位置被圍封多時，逾三星期仍未有工程開展，王先生不滿房屋署處事龜速，「圍起咗個大堂，條路封咗大半，人多嗰陣搞到出入都要排隊咁，仲話要整到七月，仲有冇耐啲？」
房署發言人解釋，上址現正興建有蓋行人通道，工程於二月八日展開後，承辦商需先進行前期工作，如圍板及髹漆，工程已在三月二日正式展開，預計七月廿四日可完成有關工程。發言人又強調，屋邨辦事處已於當眼處張貼通告，以知會市民有關工程。
「漁順樓佔成條邨近一半人口，個工程影響緊六百至七百個家庭出入，仲話要整半年！」漁灣邨區議員鍾樹根認為工程應先預製組件，然後再到現場裝嵌，以減省施工時間。