可憐天下父母心，為人父母當然想將最好嘅畀子女，如果唔係，嗰啲「便便」奶粉廣告唔會賣到鋪天蓋地，嬰兒食品亦唔會賣到成行成市。遺憾嘅係，喺香港痛錫子女嘅父母比比皆是，愛民如子嘅父母官就難搵咯，所以搞到嬰兒食品無王管，嬰兒健康無保障。
事情係咁嘅，消委會檢視市面百幾款三歲以下嬰幼兒非奶類食品，調查包裝上面嘅營養標籤有冇弄虛作假。對父母嚟講，消委會咁做可以話係功德無量㗎。你知啦，好多嬰兒食品都標榜營養豐富，講到煞有介事，有啲更加吹到天花龍鳳，係真係假根本無人知。結果發現，真係有人言過其實，消費者隨時上當受騙。
消委會發現，四分一抽檢樣本載有營養標籤或健康聲稱，其中四個樣本嘅健康聲稱，根本未有國際公認嘅科學證據支持，好似聲稱維生素Ｅ可以增強免疫力、膽鹼對眼睛發育有幫助、益生菌可以預防過敏咁，涉嫌蓄意誤導消費者。另外，一款樣本將DHA同增強寶寶抵抗力字眼放埋一齊，容易令人混淆。
又DHA，又維生素Ｅ，一大堆專業名詞，聽就聽得多嘞，但係乜東東，咪話細路仔唔識，大人一樣矇查查。浪費金錢固然激氣，最怕嬰孩補充唔到應有營養，影響身體就大件事！
港產官僚返工唔通淨係識「便便」嘅？嬰幼兒非奶類食品嘅營養標籤誤導消費者，點解無王管呢？香港成條食物標籤法放喺度，用嚟裝飾？無錯，法例係有，不過港產官僚唔知係咪食錯嘢，涵蓋範圍居然不包括三歲以下嬰幼兒包裝食品。換言之，法例只保障大人同細路哥，唔保障嬰幼兒，你話係咪低Ｂ吖！
好嘞，就算營養標籤法存在漏洞，有冇其他法例兜番呀？有，根據《公眾衞生及市政條例》，食物標籤虛假聲稱即違法，食安中心話正循呢方面跟進。咁即係話，港府一直有法不依！
等功夫茶提提大家，其實衞生署都唔係蠢到咁交關，所以喺一○年中已經講，要將三歲以下嬰幼兒食品營養標籤納入規管，可惜一路真係得個講字，到依家影都唔見，咁算唔算係虛假聲稱呢？其實，言過其實嘅何只係嬰兒食品營養成分，香港嘅購物天堂招牌睇怕都係一張假標籤。
無論法例漏洞又好，有法不依又好，立法拖拉又好，嬰幼兒食物標籤無王管，可見港府監管得過且過，兒戲過細路仔玩泥沙。無他嘅，因為佢哋根本唔在意市民嘅福祉。唔係咩？身為阿頭嘅曾蔭權只係識傍住富豪黐飲黐食，下面嘅官僚又點會關心嬰兒食咗啲乜吖？呢嗱，講起嬰兒，佢哋對一個baby愛護有加，呢個就係「寶Baby」嘞。李國寶日前被本報踢爆山頂豪宅涉嫌僭建天台屋，屋宇署到依家都懶懶閒，唔肯派人到場視察。官僚掛住關照權貴，仲邊有心思關心市民！
唉！可憐天下父母心，計功夫茶話齋，可恨難覓父母官就真！